ସନ୍ଷ୍ଟାର ଟିଭି ବ୍ୟୁରୋ
ବେଜିଂ: ଚୀନର ରାଜଧାନୀ ବେଜିଂରେ ଦେଖାଯାଇଛି ଭୟଙ୍କର ଧୂଳିଝଡ ।ତେବେ ଆଜି ଏହି ଧୂଳିଝଡ କାରଣରୁ ପୁରା ବେଜିଂ ସହର ହଳଦିଆ ରଙ୍ଗର ଆସ୍ତରଣରେ ଘୋଡେଇ ହେଲା ପରି ଦେଖାଯାଉଛି । ଗତ ୧୦ବର୍ଷ ପରେ ପୁଣି ଥରେ ଚୀନବାସୀ ଦେଖିଛନ୍ତି ଭୟଙ୍କର ଧୂଳି ଝଡ଼ । ଅନେକ ଅଞ୍ଚଳରେ କିଛି ନଦେଖାଯିବାରୁ ଲୋକେ ଦିନରେ ଗାଡ଼ିର ହେଡଲାଇଟ ଲଗାଇ ଯାତାୟତ କରୁଛନ୍ତି। ତେବେ ଏହି ଧୂଳି ଝଡ଼ ପରେ ବେଜିଂରେ ବାୟୁ ଗୁଣବତ୍ତା ସ୍ତର ୫୦୦ ଅତିକ୍ରମ କରିଛି। ଏଭଳି ସ୍ଥିତିକୁ ଡାକ୍ତର ଏବଂ ବୈଜ୍ଞାନିକମାନେ ସବୁଠାରୁ ସାଂଘାତିକ ବୋଲି କହିଛନ୍ତି। ଏହି ଧୂଳି ଝଡ଼ ପାଇଁ ୪୦୦ରୁ ଅଧିକ ବିମାନ ବାତିଲ କରାଯାଇଥିବା ବେଳେ ୩୪୦ରୁ ଉର୍ଦ୍ଧ୍ଵ ଜଣ ଲୋକ ନିଖୋଜ ହୋଇଯାଇଥିବା ଜଣାପଡ଼ିଛି ।
ଆଭ୍ୟନ୍ତରୀଣ ମୋଙ୍ଗୋଲିଆ ଏବଂ ଚୀନ୍ର ଉତ୍ତର-ପଶ୍ଚିମ ଅଞ୍ଚଳରେ ବର୍ଷା ପରେ ଏହି ଝଡ଼ ଆସିଥିବା ଜଣାପଡ଼ିଛି। ଚୀନ ପାଣିପାଗ ବିଭାଗ ସୋମବାର ବେଜିଂ ଏବଂ ଏହାର ଆଖପାଖ ଅଞ୍ଚଳରେ ୟେଲୋ ୱାର୍ଣ୍ଣି ଜାରି କରିଛି। ଏହି ଧୂଳି ମଙ୍ଗୋଲିଆରୁ ଆରମ୍ଭ ହୋଇ ଗାନସୁ, ଶାନସି ଏବଂ ହେବାଇ ପ୍ରଦେଶ ପର୍ଯ୍ୟନ୍ତ ବ୍ୟାପିଥିବା କହିଛି ଚୀନ ପାଣିପାଗ ବିଭାଗ ।
ଉତ୍ତର ଚୀନରେ ସାଧାରଣତଃ ମାର୍ଚ୍ଚରୁ ଏପ୍ରିଲ ମଧ୍ୟରେ ଧୂଳି ଝଡ଼ ହୋଇଥାଏ, କାରଣ ନିକଟ ଗୋବି ମରୁଭୂମିରୁ ବସନ୍ତ ପବନ ପାଇଁ ଧୂଳି ଉଡ଼ି ସହରକୁ ଆସିଥାଏ। ଜଙ୍ଗଲ ନଷ୍ଟ ହେବା ଏବଂ ମୃତ୍ତିକା କ୍ଷୟ ମଧ୍ୟ ଧୂଳି ଝଡ଼ର ଆଉ ଏକ କାରଣ ବୋଲି ଚୀନର ପରିବେଶ ମନ୍ତ୍ରାଳୟ କହିଛି । ତେବେ ୧୦ ବର୍ଷ ପରେ ଏପରି ଧୂଳି ଝଡ ଦେଖିଛନ୍ତି ବେଜିଂ ବାସିନ୍ଦା ।
