ସନ୍ଷ୍ଟାର ଟିଭି ବ୍ୟୁରୋ
ରାଜଗାଙ୍ଗପୁର: ମିସେସ୍ ଇଣ୍ଡିଆ ତାଜରେ ସଜେଇ ହେଲେ ଓଡିଆ ବୋହୂ ନବଦୀପ୍ କୌର । ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ବ୍ଲକ ବିଲେଇଗଡ଼ର ବୋହୂ ନବଦୀପ କୌର ଡାମନ୍ରେ ଆୟୋଜିତ ମିସେସ୍ ଇଣ୍ଡିଆ ୨୦-୨୧ ଟାଇଟେଲ୍ ଜିତି ଓଡିଶାକୁ ଗର୍ବିତ କରିଛନ୍ତି ।
ତେବେ ଗତ ୨୩ ତାରିଖରେ ଡାମନରେ ଆୟୋଜିତ ଜାତୀୟସ୍ତରୀୟ ମିସେସ୍ ଇଣ୍ଡିଆ ପ୍ରତିଯୋଗିତାରେ ୬୦ରୁ ଅଧିକ ପ୍ରତିଯୋଗୀଙ୍କୁ ପଛରେ ପକାଇ ସେ ଏହି ଟାଇଟେଲ ହାସଲ କରିଛନ୍ତି । ଟାଇଟେଲ ଜିତିବା ପରେ ନବଦୀପ୍ କୌର କହିଛନ୍ତି ଯେ ଆଜିକା ଦିନରେ ଲୋକମାନଙ୍କ ମନରେ ଏକ ଭ୍ରାନ୍ତ ଧାରଣା ଥାଏ ଯେ ଗୃହୀଣି କେବଳ ଘର ସମ୍ଭାଳୀ ପାରିବେ ଆଉ କିଛି କରିପାରିବେ ନାହିଁ । କିନ୍ତୁ ମୋ ଭାବନାରେ ଜଣେ ଦୃଢ ଇଚ୍ଛା ଶକ୍ତି ବଳରେ ଜଣେ ସବୁକିଛି କରିପାରିବ ।
ତେବେ ସେ ବୁଧବାର ବିଲେଇଗଡ଼ସ୍ଥିତ ନିଜ ଘରକୁ ଫେରିଥିଲେ । ତାଙ୍କୁ ସ୍ଥାନୀୟ ବିଧାୟକ ଡା. ସିଏସ୍ ରାଜନ ଏକ୍କା ଶୁଭେଚ୍ଛା ଜଣାଇଥିଲେ । ସ୍ଥାନୀୟ ଅଞ୍ଚଳବାସୀ ବାଜା ବଜାଇ ମିଠା ବାଣ୍ଟି ନବଦୀପଙ୍କୁ ସ୍ୱାଗତ କରିଥିଲେ । ସାଙ୍ଗସାଥୀ ଓ ପରିବାର ଲୋକଙ୍କ ପ୍ରୋତ୍ସାହନ ପାଇଁ ସେ ଏହି ଫ୍ୟାସନ୍ ପ୍ରତିଯୋଗିତାରେ ଭାଗ ନେବାକୁ ଆଗ୍ରହ ଦେଖାଇଥିଲେ । ବାପା-ମା’, ଶାଶୂ, ସ୍ୱାମୀଙ୍କ ଆଶୀର୍ବାଦ ଓ ସହଯୋଗରେ ସେ ମିସେସ ଇଣ୍ଡିଆ ୨୦-୨୧ର ତାଜ ହାସିଲ କରିପାରିଥିବା କହିଛନ୍ତି । ଆଗାମୀ ଦିନରେ ହେବାକୁ ଥିବା ମିସେସ୍ ୱାର୍ଲଡ଼ ପ୍ରତିଯୋଗିତା ପାଇଁ ସେ ପ୍ରସ୍ତୁତି ଆରମ୍ଭ କରିବେ ବୋଲି କହିଥିଲେ ନବଦୀପ କୌର ।
