ସନ୍ଷ୍ଟାର ଟିଭି ବ୍ୟୁରୋ
(image courtesy- Business Today)
ଚେନ୍ନାଇ: ମଣିଷ ପାଲଟି ଯାଇଛି ଅମଣିଷ । ଅମାନବୀୟତାର ସମସ୍ତ ସୀମା ଟପିଯାଇଛି ମନୁଷ୍ୟ । ତାମିଲନାଡୁର ନୀଳଗିରି ଜିଲ୍ଲାରେ ଘଟିଛି ଏକ ଅଭାବନୀୟ ଘଟଣା । କିଛି ଲୋକ ହାତୀ ଉପରେ ଜଳନ୍ତା ଟାୟାର ପକାଇ ତାକୁ ଜିଅନ୍ତା ଜଳାଇ ହତ୍ୟା କରିଛନ୍ତି ।କେବଳ ସେତିକି ନୁହେଁ ଜଳନ୍ତା ଟାୟାର ପକାଇ ହାତୀଟିର ଫୋଟୋ ଓ ଭିଡିଓ ମଧ୍ୟ କରିଛନ୍ତି ।
ତେବେ ବନ ବିଭାଗ ଅଧିକାରୀଙ୍କ କହିବା ଅନୁସାରେ,ଏକ ରିସର୍ଟ ଭିତରେ ହାତୀ ପଶି ଯାଇଥିବାରୁ ତାକୁ ସେଠାରୁ ଘଉଡାଇବା ପାଇଁ ତା ଉପରେ ନିଆଁ ଲଗାଯାଇଥିବା ଟାୟାର ଫୋପାଡି ଦେଇଥିଲେ । ହାତୀକୁ ବନ ବିଭାଗ ଉଦ୍ଧାର କରିବା ସମୟରେ ତାହାର ଶରୀର ଜଳି ଯାଇଥିଲା ଓ କାନରୁ ରକ୍ତ ମଧ୍ୟ ବାହାରୁ ଥିଲା ।ଏହା ପରେ ହାତୀଟିର ମୃତ୍ୟୁ ହୋଇଥିଲା । ଏହି ମାମଲାରେ ପୋଲିସ ଦୁଇଜଣଙ୍କୁ ଗିରଫ କରିଥିବାର ଜଣାପଡିଛି।
ତେବେ କିଛି ଦିନ ପୂର୍ବରୁ ଏକ ଗର୍ଭବତୀ ହାତୀକୁ ଖାଦ୍ୟରେ ବାରୁଦ ଦେଇ ହତ୍ୟା କରିଥିଲେ କିଛି ଲୋକ । ଯାହା ସୋସିଆଲ୍ ମିଡିଆରେ ମଧ୍ୟ ଭାଇରାଲ ହୋଇଥିଲା । ଏବେ ଘଟିଛି ଏପରି ଆଉ ଏକ ଘଟଣା ଯାହା ମଣିଷର ମଣିଷ ପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରୁଛି ।
