ସନ୍ଷ୍ଟାର ଟିଭି ବ୍ୟୁରୋ
ଭୁବନେଶ୍ଵର: ଭାରତ ଓ ଚୀନ୍ ମଧ୍ୟରେ ଦିନକୁ ଦିନ ବିବାଦ ବଢିବାରେ ଲାଗିଥିବା ବେଳେ ଭାରତୀୟ ସେନା ଲଗାତାର ଭାବେ ନିଜର ଶକ୍ତିକୁ ଆହୁରି ବଢାଇବାରେ ଲାଗିଛି। ଖୁବ୍ଶୀଘ୍ର ଭାରତୀୟ ସେନାରେ ସାମିଲ ହେବ ଆର୍ଟିଲରୀ ଗନ୍ ‘ହାୱିଜର୍। ପ୍ରତିରକ୍ଷା ଗବେଷଣା ଏବଂ ବିକାଶ ପ୍ରତିଷ୍ଠାନ (ଡିଆରଡିଓ) ଦ୍ବାରା ସମ୍ପୂର୍ଣ୍ଣ ସ୍ବଦେଶୀ ଜ୍ଞାନକୌଶଳରେ ହାୱିଜର୍ସ ଆଡ୍ଭାନ୍ସଡ୍ ଆର୍ଟିଲରୀ ସିଷ୍ଟମ ନିର୍ମାଣ କରାଯାଇଛି । ବାଲେଶ୍ଵର ଜିଲାର ଚାନ୍ଦିପୁରସ୍ଥିତ ଫାୟାରିଂ ରେଞ୍ଜରେ ଏହାର ପରୀକ୍ଷା କରାଯାଇଛି। ଯାହାକୁ ବିଶ୍ଵର ସର୍ବୋତ୍ତମ ତୋପ ବୋଲି ଏଟିଏଜିଏସ ପ୍ରକଳ୍ପର ନିର୍ଦେଶକ ଶୈଳେନ୍ଦ୍ର ଗାଡ଼ା କହିଛନ୍ତି। ଏବଂ ଅନ୍ୟ କୌଣସି ଦେଶ ବର୍ତ୍ତମାନ ସୁଦ୍ଧା ଏପରି ତୋପ ବିକଶିତ କରିବାରେ ସକ୍ଷମ ହୋଇ ନାହାନ୍ତି ବୋଲି ସେ କହିଛନ୍ତି।
ଗାଡ଼ା କହିଛନ୍ତି, ଏହି ତୋପକୁ ୩ ବର୍ଷ ମଧ୍ୟରେ ଡିଜାଇନ୍ କରାଯାଇଥିଲା। ଖୁବଶୀଘ୍ର ଏହାର ପିଏସକ୍ୟୁଆର ପରୀକ୍ଷଣ କରାଯିବ। ଆର୍ଟିଲରୀ ସିଷ୍ଟମ କ୍ଷେତ୍ରରେ ଭାରତ ସବୁଠୁ ବଡ଼ ସଫଳତା ହାସଲ କରିବ। ଉଲ୍ଲେଖଯୋଗ୍ୟ, ସ୍ୱଦେଶୀ ଜ୍ଞାନକୌଶଳ ମାଧ୍ୟମରେ ଅସ୍ତ୍ରଶସ୍ତ୍ର ତିଆରି ଉପରେ ସରକାର ଗୁରୁତ୍ୱ ଦେଉଛନ୍ତି, ଯାହାଦ୍ୱାରା ଦେଶ ପ୍ରତିରକ୍ଷା କ୍ଷେତ୍ରରେ ମଧ୍ୟ ଆତ୍ମନିର୍ଭରଶୀଳ ହେବା ଦିଗରେ ଅଗ୍ରସର ହେଉଛି।
ଭବିଷ୍ୟତରେ କୌଣସି ରାଷ୍ଟ୍ର ସହ ଯଦି ଯୁଦ୍ଧ ହୁଏ, ତେବେ ଭାରତ ନିଜର ସ୍ବଦେଶୀ ଅସ୍ତ୍ରଶସ୍ତ୍ରରେ ଲଢ଼ିବ ଏବଂ ଶତ୍ରୁଙ୍କୁ ଧୂଳି ଚଟାଇବ ବୋଲି ସେ କହିଥିଲେ। ଚୀନ ଏବଂ ପାକିସ୍ତାନ ସହିତ ସୀମାରେ ଉତ୍ତେଜନା ଜାରି ରହିଥିବାବେଳେ ଏହାକୁ ଦୃଷ୍ଟିରେ ରଖି ସେ କହିଥିଲେ, ପ୍ରତିରକ୍ଷା କ୍ଷେତ୍ରକୁ ନେଇ ଆମ ଘରୋଇ ଉଦ୍ୟୋଗଗୁଡ଼ିକ ବହୁ ଉତ୍ସାହିତ। ସେମାନଙ୍କୁ ସମର୍ଥନର ଆବଶ୍ୟକତା ରହିଛି। ଭବିଷ୍ୟତରେ ହେବାକୁ ଥିବା ଯୁଦ୍ଧକୁ ଆମେ ସ୍ବଦେଶୀ ଅସ୍ତ୍ରଶସ୍ତ୍ର ବଳରେ ଜିତିବୁ ବୋଲି ସେ କହିଥିଲେ।
#WATCH DRDO-developed indigenous Howitzer Advanced Towed Artillery Gun System test-firing at the Balasore firing range in Odisha pic.twitter.com/mjp8g0CVVt
— ANI (@ANI) December 19, 2020
